雨落

2018年8月29日星期三

紐西蘭遊記 - 開坑

我在2018年7月17日到27日去了紐西蘭旅行，講下點解我要開呢個坑講下自己做乜先，其實有三個原因。

1. 我發現自己記憶力真係太差，想留下記憶
自從大學去exchange之後，我去咗四川、西藏旅行 (見西藏遊記)，之後其實都去過台灣環台旅行，想過開坑寫遊記(殘念在此)，但無奈無分配到時間去寫，然後拖咗一年，感覺自己漸漸遺忘真正嘅感受，所以就放棄咗。另外，又去咗京阪神一次，不過嗰次就無乜好寫，因為無乜好回憶，純粹打卡。

然後，2016年暑假我又去咗濟州，係我覺得比較精彩嘅旅行，因為變化好大，節奏由勁chur變成勁迆，而且自己嘅諗法係有被重視，所以可以分享小小。不過又因為太耐，所以放棄咗。

2017年4月去咗柬埔寨短宣，其實我係行程書記，所以每日都有寫小小反思。但係因為唔知邊啲講得邊啲唔講得，話曬呢個都係公開平台，所以又無開到。

2017年暑假我又去咗兩個旅行，報咗伏味極濃嘅華東五天團，基本上係購物團，而且架車伏到我發燒，因為太熱。然後同朋友S去咗花蓮，享受咗四日，其實都可以開坑講下。

啊，差啲唔記得，2015年聖誕都去過南京同蘇州旅行，其實都有好多思考，不過都忘記咗大部分了。

總結係，發現旅行當中嘅思想實在流失得太快，但卻希望可以以文字留下呢個回憶，亦都讓自己有一個思考嘅空間。

2. 呢次旅行真係太好，想留下記憶
番黎之後有個去過NZ一個月旅行嘅朋友問我：「紐西蘭好唔好玩啊？」
我：「紐西蘭又唔係幾好玩嘅？因為好似睇風景多。」
佢：「去紐西蘭唔係玩，去紐西蘭係生活。」

我覺得呢個講法真係幾好，去紐西蘭其實係一種生活，一日行一個景點嘅輕鬆，實在喺香港係搵唔到。另外，亦有兩個好同伴，大家節奏差唔多，亦都好包容小弟，所以感覺好好。今次旅行嘅美好回憶值得記下。

3. 想尋找「意義」
我諗作為一位基督徒，明白到對於自己嘅生命，自己只係一個管家。聖經話：「『凡事都可行』，但不都有益處。『凡事都可行』，但不都造就人。......所以，你們或吃或喝，無論做甚麼，都要為榮耀上帝而做。」(哥林多前書10:23,31) 教導我要榮耀上帝。榮耀上帝，根據上文就叫我地唔好拜偶像，同埋憐憫信心軟弱嘅人。根據下文，就係「你們不要使猶太人、希臘人，或上帝教會中的人跌倒；但要像我一樣，凡事都使眾人喜歡，不求自己的益處，只求眾人的益處，使他們得救。你們該效法我，像我效法基督一樣。」(林前10:32, 33; 11:1) 其實再睇落去有更加多嘅意義，有興趣嘅讀者可以自己查考聖經，但唔係本文嘅重點。

如果做乜都要為榮耀上帝而做，咁我就必須諗：「到底我去呢一次旅行能唔能夠榮耀到上帝呢？」去旅行前，有一位傳道叫我地「帶著耶穌去旅行」，我諗都可以藉著今次去到重新反思，到底今次旅行喺神眼中有冇意義呢？

意義呢家嘢，有時唔去反思、沉澱，就會失去咗。輕則白廢咗一個旅行嘅時間，但係如果喺人生當中唔去諗清楚，迷失嘅時間必定比起去一次旅行更多。去完，打咗卡，so what? 我諗世上失喪的人太多，但係唔需要講世界，首先要保住自己先。從自己出發，先再講改變世界。我相信今次嘅反思都可以幫助我諗到底之後旅行仲有乜意義？定不如留喺香港靜修。

2017年8月18日星期五

神的參與

一直都忘記不了一個片段。就正正身在土耳其的一個地方，我係一位基督徒──一位識得彈琴嘅基督徒，亦都可以擔任司琴呢個角色。

作為基督徒，返教會係好正常不過嘅事。作為華人，返華人教會係好正常嘅事。作為香港人，識彈琴係好正常嘅事。作為識彈琴嘅信徒，有做下司琴都係好正常。而作為一位大學生，去交流係好正常，土耳其只係偶然之下一個好奇嘅選擇。於是乎──一位香港司琴參與土耳其華人教會，其實係好正常嘅事。

有一日好普通嘅一個主日，大概係我當時20年人生入面千次主日敬拜神入面普通的一次，我繼續去教會敬拜神。然後佢無聊問起就發現我係識彈。跟住點？正常應該好正常嘛，真係好正常。點知佢地突然間好感恩，原來佢地唯一一位司琴突然間唔係好掂未練敬首歌，原來佢就快要走。於是乎教會領袖好努力祈禱希望有人做司琴，結果我就成為咗果個人。

神嘅參與到底係咪就係喺咁正常之內？正常到令我到而家都嘖嘖稱奇，因為佢地睇黎真係好感恩。

我自己嘅人生都係好普通好正常，仿佛神的工作無乜喺我身上成就。但或者就係喺普通中，神就在暗暗地工作，令到萬事都互相效力。

2017年2月11日星期六

2017

2017年了，繼續「讀」PhD。其實每次被問我到底做緊乜，我都會lag機。如果要完全去講，大約我同時做緊以下幾樣嘢：做研究、自學、上堂、做TA。對於一個喺科大讀PhD嘅year 1黎講，以上呢四樣嘢基本上缺一不可。總括黎講，我係咪讀緊書呢？又好似唔係大家所想像嘅讀書，因為我上堂嘅時間已經好少，大約今個sem每個星期只係有3個鐘英文、2個鐘sit堂同埋3個鐘外星科。大約「讀」PhD都只係一個簡稱，亦係以我有限中文能力可以做到最好。

2017年開始，又過埋農曆新年，就係基督徒立志嘅好時機。但係今年我無立過志，亦都無乜目標。而家陷入咗一個好可憐嘅境況入面──有各樣能力（而我依然唔知邊樣先係神所賜嘅恩賜）、有各樣事奉，但係同上帝嘅關係卻係唔係太親近。

我去咗神學路思培靈研經會中間三日嘅培靈會同埋星期三五嘅研經會，入面嘅內容實在非常之培靈。以下係我個人嘅反思，同埋小小記錄，唔代表講員真係指呢個意思。面對住香港呢個情況，我地好容易失去盼望。但係，原來喺聖經入面，上帝本身就可以係我地盼望嘅一個來源。對一個基督徒黎講，當然上帝國臨到、公義得彰顯係好事，亦係我地所應該追求的。但係面對住咁絕望嘅情況，保羅卻話「現在的苦楚，若比起將來要顯示給我們的榮耀，是不足介意的。」(羅8:18)

另外，從詩篇35篇，大衛比仇敵追殺的時候，亦都可以發現大衛無祈求自己去報仇，亦都無離棄神，而係求神去同佢地相爭。呢個將希望交托在神手的精神，其實先至係最安全。因為天地都要廢去，但上帝的話不會廢去。神亦都自己係自有永有的。

但對我黎講，呢種盼望係真係好難。我自己每一日嘅生活，除咗祈禱讀經番教會嘅時間之外，其實面對嘅都係世事。世界同engineering嘅知識不斷話比我知：「計好數，信自己，呢種先係真正嘅盼望」「自己的香港自己救」。我自己係工業工程及物流管理出身，我覺得呢一科最正嘅就係佢非常之生活化同埋界限好大。由產品設計、去到整機械(雖然完美被carry)、入貨、心理學、生產、設施布局(facility layout)以至於交通，都有包括在內。自從有p-值計算之後，甚至連古代以為係「撞彩」嘅事，我地都可以用95% confidence interval令到佢好似計到咁樣，喺變數同不能精確計算之中都作出一個精確嘅計算，即使最後fail咗，至少都唔太差，至少喺件事發生之前，我有95%機會係成功，點知5%都比我中咗。

其中一晚嘅講題卻直接打入我自己嘅心入面，因為佢正正提醒咗我：對於一個基督徒黎講，盼望唔應該係黎住計算同埋相信自己。我地盼望係在乎神。

的確，神係最偉大。神創造一切人類，又無所不在，卻愛我地，差派愛子耶穌基督道成肉身，打破咗我地罪人同埋神之間嘅隔閡。讓到我地可以相信神，認識神更加多。後來更差派聖靈內住在凡信祂的人心中，使我地能夠持續去認識佢。點解我地反而去相信人類嘅力量？

所以，我們不喪膽。雖然我們外在的人日漸朽壞，內在的人卻日日更新。我們這短暫而輕微的苦楚要為我們成就極重、無比、永遠的榮耀。因為我們不是顧念看得見的，而是顧念看不見的；原來看得見的是暫時的，看不見的才是永遠的。(林後4:16-18)

2016年8月29日星期一

Window 10 ‧ Browser ‧ 近況

做D日常嘅記錄，順便等呢個blog可以繼續生存落去：

1) 近排過住每日番工嘅日子，成功攞到勤工獎（雖然唔會有獎）：連續兩個半月都無請過假。Intern其實經歷好多，亦學咗極多新嘢同埋見識好多，不過真心唔知對於將來有乜用。但無論如何，總算番咗人生第一份full time。如果我早一年做呢份工呢個位，或者我呢個時候已經入番呢間公司做緊trainee，我覺得Data Analytics真係幾好玩。同埋今次有一樣更加好嘅嘢就係大家嘅才幹都唔同，又有人carry，所以透過合作可以1+1>2。(其實有好多detail位都想分享，不過我唔肯定邊D係公司機密邊D唔係，所以就不便透露。)

2) 我終於喺臨結束Windows 10 免費升級之前冒住死機嘅風險將我部電腦升級成Windows 10，所有我常用嘅程式，同埋我唯一有玩嘅PC Game simutrans都玩到，不過好似喺打速成速度方面唔夠Windows 7 快。

3) 趁升Windows 10，有試用Microsoft強力推介嘅Edge，但係其實無佢講得咁快同埋有好多bug，例如yahoo字典search無咗個底色，Coursera又不斷死機，非常差。與此同時，我最常用嘅Firefox同Facebook又繼續唔啱key，成日打字都多咗粒字，想打十個字都用我成30秒。結果，重回Google Chrome嘅懷抱，希望Google Chrome唔好又狂死機。

4) 好似就快開學，但係so far我一個PhD同學都唔識，希望可以好似year 1噉喺上堂嘅時候就識到新朋友啦。如果唔係可能就其實自己一個更開心~

5) 信仰方面，都繼續維持完咗門訓之後嘅情況：番聚會穩定、靈修七日有五日、有練敬拜有領敬拜、間中出席下臨時聚會。啱啱個星期日晚講到傳福音：UFire 勇哥就不斷用成功的見證(唔係學傳果個)黎鼓勵我地，分享咗好多人傳福音嘅方法。叫我地好似耶穌一樣：Pray、Care、Share。之後回應嘅學生就講到整全福音，提醒我要有一個完全作門徒嘅生命。而回應嘅一個老人家就叫我地注意一下傳福音、轉化校園將會帶來嘅挑戰。

其實我好清楚信耶穌到底有幾重要，的而且確係一個關乎靈魂嘅問題。只不過係比佢講中咗，係基督的愛唔能夠完全融入我心裏：我似乎唔只要十字架的愛，更加想要經歷神每天帶領、賜福的愛。因為呢個「政治不正確」嘅感覺，結果上年變成責任式佈道。就快開學，又係會比人挑戰，同埋有好多佈道機會嘅時候，我到底點樣回應？

2016年7月18日星期一

台灣遊記(前傳3) - 試踩: 屯門‧元朗‧大西北

(最近開始番新工，不是太適應新工的節奏，又要趕住喺還書日之前睇書，所以未能撥耽寫遊記。希望可以喺暑假前完成台灣遊記+濟洲遊記啦)

第二次練習
我們在台灣的時候，每天所踩的都是新的路。照樣，我們在香港的第二次練習也找了一條新的路線來練習。這次我們由元朗開始，直接騎單車經青山公路到屯門，直至蝴蝶灣公園，然後回程。到元朗後再經南生圍到錦上路一帶，然後入夜則回程交車。

輕鐵軌旁的單車徑 (時間: 12:34)

屯門河旁新墟公園(時間: 13:07)

蝴蝶灣公園旁的沙灘，風景優美(時間: 13:48)

全景(時間: 13:48)

走錯路，到了南生圍的對岸(時間: 16:08)

南生圍的標誌: 過河舢舨 (時間: 16:28)

真‧南生圍草地 (時間: 16:38)

錦上路，還記得當天前幾天在此所發生不幸的意外(時間: 17:34)

FB上我們踩單車的記錄

然後完了就各自回家去了，2次的試踩亦準備完成。
p.s. 速度比想像中慢，故已經打算在真實台灣之旅當中減速，所以後來我們估計需要約2星期才能完成。

由於我於2015年12月24日到2015年12月30日間需要到南京參與一個志工服務團，之後於2016年的頭2天亦有一個教會團契的營會，於是我在此之後再沒有練習過。然而，柏積跟山姆還有過最後一次的練習。

(下回: 出發前的物資、台灣的第一夜)

2016年5月26日星期四

台灣遊記系列(前傳2) - 為何要去?出發前的準備

為何要去? 起初是不知誰提出這個計劃的，但我當時以不夠錢為理由（要記得我暑假才去了西藏）而拒絕參與這個旅行。後來卻發現原來自己所擁有的財富竟然足夠參與這個旅程：這個旅程原本估計需要花約$7000，反正$10000以內一定成事。

單車環台，實在是年輕才可以作的事，萬一老了可能就沒有能力再這樣去連續騎車。而且當時我前路未明，實在未能肯定將來還有沒有機會花這麼長的時間去單車旅行，所以我決定把握最後一個假期參與這個旅程。

旅伴有兩位，為保護同伴的私隱，在以下遊記中將會稱為柏積和山姆。兩位都是比我年輕的科大同學（突然發現自己很老 T_T）。由於山姆在2015年的秋季學期出國交流，而我在他回來後的聖誕期間則參與了南京的服務團，所以下列兩次的練車都是只有我和柏積。

兩次練車都是於study break和final期間，雖然我21 credit，柏積24 credit，但也許我們都不約而同地理解到：GPA其實沒有甚麼意義，經歷、學習才真正有意義。何況，只要時間分配得當，其實要保著自己的hon並不難。

練車除了訓練自己以外，還是為了認識自己的能力──畢竟我們都有一段時間沒有認真踩單車了。

第一次練習
日期: 2015年12月7日
天氣: 陰、涼

柏積和我第一次是於大水坑租車，先吃個午飯，原定踩入粉嶺，但後來因為見還有時間，所以直入河上鄉吃豆腐花。